Հայաստանում ազատ են արձակել մաթեմատիկոս Միխայիլ Վերբիցկուն

Հայաստանում ազատ են արձակել մաթեմատիկոս և բլոգեր Միխայիլ Վերբիցկուն, ով ավելի վաղ բերման էր ենթարկվել «Զվարթնոց» օդանավակայանում: 72 ժամ ժամանակավոր պահման մեկուսարանում անցկացնելուց հետո՝ նա ազատ է արձակվել: Այս մասին հայտնել է նրա փաստաբան Վաչե Սիմոնյանը:

Փաստաբանի խոսքով՝ Վերբիցկին գտնվում էր միջազգային հետախուզման մեջ՝ Ռուսաստանի պահանջով: Չնայած ազատ արձակմանը, նա դեռևս չի կարող լքել երկիրը՝ սահմանը հատելու գործող արգելքի պատճառով: Ընդ որում, նա արդեն իսկ գնել է Թել Ավիվի չվերթի տոմս, և պաշտպանական կողմը միջնորդություն է ներկայացրել Գլխավոր դատախազություն՝ խնդրելով թույլատրել մեկնումը:

Հայտնի է, որ Վերբիցկին դասավանդել է Տնտեսագիտության բարձրագույն դպրոցի մաթեմատիկայի ֆակուլտետում: 2005 թվականին, «LiveJournal»-ում իր հաշվի արգելափակումից հետո, նա ստեղծել է LJ.Россия այլընտրանքային հարթակը, որը 2013 թվականին արգելափակվել է «Ռոսկոմնադզոր»-ի կողմից: