Արթիկում Երկրորդ աշխարհամարտում զոհվածների հուշակոթողը կտեղափոխվի

ՀՀ կառավարությունն այսօրվա նիստի ժամանակ թույլատրեց Շիրակի մարզի Արթիկ քաղաքի Ազատության հրապարակում գտնվող Երկրորդ աշխարհամարտում զոհվածների հուշակոթողը տեղափոխել Սասունցի Դավթի 27 հասցեում գտնվող Բարեկամության այգի:

Այս որոշումն ընդունվել էր դեռ 2005 թվականի դեկտեմբերի 29–ին, որտեղ նշվում էր, թե հուշարձանների նյութական պահպանությունը պահանջում է այն տեղափոխել:

«Հայրենական մեծ պատերազմի զոհերի՝ մոնումենտալ արվեստի հուշարձանի նյութական պահպանության լավագույն շահը ապահովելու համար անհրաժեշտություն է առաջացել հուշարձանի տեղափոխումը հանրության համար հասանելի, բարենպաստ տեսողական ընկալման պայմաններ ապահովող համահունչ և հարմարավետ միջավայր»,– նշված է որոշման մեջ:

Հուշարձանը հենց տեղափոխվի Բարեկամության այգի, կառավարությունը կսկսի հիմնանորոգման աշխատանքներ իրականացնել, բարեկարգել այդ տարածքը:

Կառավարությունից վստահեցնում են, որ արդյունքում այգին կլինի բարեկարգված, ընդլայնված և տեղափոխվող հուշապատը կլինի իր նախկին պատմական տեսքով։