Նոյեմբերի 1-ից փոխվում են Հայաստանում կացության կարգավիճակ ստանալու կանոնները

Նոյեմբերի 1-ից Հայաստանի Հանրապետությունում ուժի մեջ են մտնում կացության կարգավիճակ ստանալու նոր ընթացակարգեր։ Փաստաթղթերի ներկայացումն ամբողջությամբ իրականացվելու է էլեկտրոնային եղանակով, ներդրվում են ամենամյա քվոտաներ, իսկ գործարարների համար առաջին անգամ սահմանվում են հստակ ֆինանսական պահանջներ:

Անհատ ձեռնարկատերերի համար սահմանվել է ֆինանսական շեմ․ դիմելուն նախորդող 2 ամսում անհրաժեշտ է ունենալ առնվազն 1 միլիոն դրամի շրջանառություն կամ բիզնես հաշվին համապատասխան գումարի առկայություն: ՍՊԸ հիմնադիրները պարտավոր են ընկերության կանոնադրական կապիտալում ներդնել առնվազն 2 միլիոն դրամ: Եթե ընկերությունը 180 օր անընդմեջ հարկային պարտավորություններ չկատարի, կացության կարգավիճակը կարող է չեղարկվել:

Փոխվում են նաև տրամադրման ժամկետները․ ձեռնարկատիրական գործունեության հիման վրա 5-ամյա (մշտական) կացության կարգավիճակ այլևս անմիջապես չի տրամադրվի: Սկզբնական շրջանում կտրվի 1 տարվա կարգավիճակ, իսկ 5-ամյա կարգավիճակի համար հնարավոր կլինի դիմել միայն 3 տարվա անընդմեջ բնակությունից հետո:

Կառավարությունը սահմանելու է նաև օրինականացման տարբեր հիմքերի համար ամենամյա քվոտաներ: Դրանց սպառվելուց հետո էլեկտրոնային համակարգն ավտոմատ կերպով կդադարեցնի հայտերի ընդունումը: Քվոտաների չափերն առայժմ չեն հրապարակվել:

Միևնույն ժամանակ դադարեցվում է հատուկ (10-ամյա) կացության կարգավիճակի դիմումների ընդունումը, այդ թվում՝ ազգությամբ հայերի համար: Նախկինում տրամադրված փաստաթղթերը պահպանում են իրենց իրավական ուժը: Փոխարենը նախատեսվում է ներդրումների դիմաց կացության կարգավիճակ ստանալու հնարավորություն, սակայն ներդրումների նվազագույն շեմն առայժմ սահմանված չէ:

Մինչև նոյեմբերի 1-ը ներկայացված դիմումները կգնահատվեն նախկին կանոնակարգերով, երբ շրջանառության հստակ պահանջներ չկային, իսկ կացության ժամկետը որոշվում էր միգրացիոն մարմինների հայեցողությամբ: