Իրանի ՆԳՆ ղեկավարը չի հաստատել տեղեկությունը, որ Իրանի նախագահը չի տուժել ուղղաթիռի վթարից հետո

Իրանի ՆԳՆ ղեկավարն առայժմ չի հաստատում տեղեկությունն այն մասին, որ Իրանի նախագահ Իբրահիմ Ռաիսին չի տուժել ուղղաթիռի վայրէջքից հետո, նրա հետ կապ չկա, հաղորդում է RT-ն՝ վկայակոչելով Al-Masirah հեռուստաալիքին:

Ավելի վաղ Մեհր գործակալությունը հայտնել էր, որ Ռաիսին լավ է, նա ավտոշարասյան կազմում մեքենայով Թավրիզ է ուղեւորվում: Նախագահական ուղղաթիռի կործանման վայր են ժամանել փրկարարական ջոկատները, հաղորդում է IRNA գործակալությունը:

Դեպքի մասին փրկարարներին հայտնելուց մոտ մեկ ժամ անց փրկարարական ջոկատները ժամանել են դեպքի վայր, և սկսվել են որոնումները: Տարածք են ուղարկվել 20 փրկարարական խմբեր և անօդաչու թռչող սարքեր, սակայն տեղանքը հատելու դժվարության, նրա լեռնային և անտառային պայմանների, ինչպես նաև եղանակային վատ պայմանների, հատկապես ուժեղ մառախուղի պատճառով որոնողափրկարարական աշխատանքները ժամանակ կպահանջեն:

Հիշեցնենք, որ Իրանում վթարի էր ենթարկվել նախագահ Ռաիսիին տեղափոխող ուղղաթիռը։ Օդանավում է եղել նաև Իրանի արտգործնախարար Հոսեյն Ամիր Աբդուլահիյանը: