«Արարատ-Արմենիա»-ն հաղթեց «Ռիգա»-ին Չեմպիոնների լիգայի որակավորման առաջին խաղում

Հայաստանի գործող չեմպիոն «Արարատ-Արմենիա»-ն հաղթանակով մեկնարկեց ՈւԵՖԱ-ի Չեմպիոնների լիգայի որակավորման առաջին փուլում։ Երևանյան թիմը տնային հանդիպմանը ուժերը չափեց Լատվիայի չեմպիոն «Ռիգա»-ի հետ և վստահ առավելության հասավ 2:0 հաշվով։

Աբովյանի Վահագն Թումասյանի անվան մարզադաշտում կայացած խաղի 63-րդ րոպեին հաշիվը բացեց պորտուգալացի մասնագետ Մանուել Տուլիպայի գլխավորած թիմի պաշտպան՝ նույնպես պորտուգալացի Ուգու Օլիվեյրան։ Հիմնական ժամանակի ավարտից քիչ առաջ՝ 86-րդ րոպեին, բրազիլացի հարձակվող Կառլոս Ֆրանսան կրկնապատկեց դաշտի տերերի առավելությունը՝ ձևակերպելով հանդիպման վերջնահաշիվը։

Նշենք, որ հյուրերը հանդիպման վերջնամասն անցկացրին տասը հոգով. 72-րդ րոպեին լատվիական թիմի դարպասապահ Ֆրենկս Դավիդս Օրոլսը սեփական տուգանային հրապարակից դուրս ձեռքով խաղալու և մրցակցի հնարավոր գոլը կանխելու համար արժանացավ ուղիղ կարմիր քարտի ու հեռացվեց խաղադաշտից։

Թիմերի միջև պատասխան հանդիպումը կկայանա հուլիսի 14-ին՝ Ռիգայում։