Հայաստանը պարզապես հրաժարվեց Ստեփանակերտից՝ հանուն իր շահերի. Ռուսական խաղաղապահ առաքելություն

Երեք տարի առաջ՝ 2020 թվականի նոյեմբերի 10-ին, Ռուսաստանի և Ադրբեջանի նախագահների, ինչպես նաև Հայաստանի վարչապետի եռակողմ հայտարարության համաձայն, ռուսական խաղաղապահ զորախումբը մտցվեց Լեռնային Ղարաբաղ։ Առաջին իսկ օրերից ռուս խաղաղապահները սկսել են աշխատել տարածաշրջանում խաղաղ կյանքը վերականգնելու ուղղությամբ: Այս մասին գրում է Ռուսական խաղաղապահ առաքելության տելեգրամյան ալիքը։

«Քաղաքացիների անվտանգության ապահովումը, ականների հեռացումը, վերանորոգման և գյուղատնտեսական աշխատանքներին մասնակցելը, կարիքավորներին մարդասիրական օգնության տրամադրումը, տեղի բնակչությանը բժշկական օգնություն ցուցաբերելը դարձել են ռուս խաղաղապահների ամենօրյա գործունեության հիմքը։

Չնայած այն հանգամանքին, որ տարածաշրջանում շարունակվել են քաղաքական խաղերը, որոնք հանգեցրել են խաղաղապահ զորախմբի գործունեությունը նսեմացնելու փորձերին, ռուս զինվորականները շարունակել են ծառայությունը»,- նշվում է գրառման մեջ։

Այս տարվա սեպտեմբերի 19-20-ը տեղի ունեցավ իրավիճակի հերթական սրումը, որը, ցավոք, դարձյալ հանգեցրեց ռազմական գործողությունների և երկու կողմից մարդկանց մահվան, ասվում է հրապարակման մեջ։

«Հարկ է նշել, որ որքան էլ հայ քարոզիչները փորձում են «Ղարաբաղի հանձնման» մեջ մեղադրել Ռուսաստանին և նրա խաղաղապահներին, փաստերը հակառակն են ասում։ Երևանի կողմից ստանձնած պարտավորությունների կատարման ձգձգումը (սահմանազատում, տրանսպորտային միջանցքների բացում), ինչպես նաև Փաշինյանի կողմից Ղարաբաղի տարածքը Ադրբեջանի կազմում հրապարակայնորեն ճանաչելը բացառեց հակամարտության երկրորդ կողմը։

Այս պայմաններում ռուս խաղաղապահներն այլեւս չէին կարող խանգարել Բաքվին իր տարածքում կարգուկանոն հաստատել։ Ի վերջո, Հայաստանը, որը բանակցային գործընթացում ներկայացնում էր Լեռնային Ղարաբաղի շահերը, պարզապես հրաժարվել է Ստեփանակերտից՝ հանուն իր անմիջական շահերի։

Ինչ էլ որ լինի, ռուս խաղաղապահներին հաջողվեց գլխավորը՝ օգնել հրադադարի շուտափույթ հաստատմանը և նվազագույնի հասցնել խաղաղ բնակչության մահը։

Հիշեցնենք, որ այս օրը խաղաղապահ գործողության ընթացքում իրենց կյանքն են տվել յոթ ռուս զինծառայողներ, որոնք մինչև վերջ պաշտպանել են խաղաղությունը տարածաշրջանում»,- ասվում է գրառման մեջ։