Ադրբեջանում ազատությունից զրկված հայերը պետք է ազատ արձակվեն․ ՀՀ ՄԻՊ

«Ադրբեջանում ազատությունից զրկված բոլոր հայերը պետք է անհապաղ ազատ արձակվեն»,- Հանրային ռադիոյի «Առանց տողատակի» հաղորդման շրջանակում նշել է Մարդու իրավունքների պաշտպան Անահիտ Մանասյանը։

Լևոն Սարդարյանի հետ զրույցում Պաշտպանն ընդգծել է, որ թեմային անդրադարձել է անընդհատ, առանց որևէ դիմումի` սեփական նախաձեռնությամբ, և շարունակելու է բարձրաձայնել այն՝ օգտագործելով ինչպես հրապարակային, այնպես էլ ոչ հրապարակային գործիքները:

Անդրադառնալով Ռուբեն Վարդանյանի հայտարարությանը՝ Պաշտպանը նշել է, որ միշտ կարևոր է հստակեցնել համանման այցերի նպատակը. «Եթե քաղաքացիների կարծիքով` նման այցերի նպատակը պետք է լինի իմ կողմից մշտադիտարկում իրականացնելը, ապա պետք է արձանագրել, որ դա անհնար է այլ պետության տարածքում»։

Անդրադառնալով ՄԻՊ անկախությանը՝ Անահիտ Մանասյանն ընդգծել է, որ Մարդու իրավունքների պաշտպանի հաստատության անկախությունը չի կարող պայմանավորված լինել այն հանգամանքով, թե որքանով են այդ գործունեության համատեքստում քաղաքական դերակատարները բավարարված համարում իրենց քաղաքական նպատակները:

Ամենապարադոքսալը այս առումով այն է, որ ՄԻՊ անկախության մասին խոսում են այն դերակատարները, ովքեր ժամանակին ունեին պարտավորություններ` կատարելու ՄԻՊ անկախության երաշխավորմանն ուղղված միջազգային հանձնարարականները ու որևէ քայլ չեն ձեռնարկել դրանք կատարելու ուղղությամբ:

Պաշտպանը նաև նշել է, որ 2025 թվականին ՄԻՊ գործունեության արդյունավետությունը եղել է բավական բարձր. պետական մարմինների կողմից կատարվել կամ մասնակի է կատարվել համակարգային բնույթ ունեցող ՄԻՊ առաջարկների շուրջ 70 տոկոսը։

Զրույցի ընթացքում Անահիտ Մանասյանն անդրադարձել է նաև մի շարք այլ կարևոր հարցերի՝ վերաբերելի քրեակատարողական համակարգի բարեփոխումներին, խնամքի հաստատությունների ապաինստիտուցիոնալացման գործընթացին, ինչպես նաև իրավունքների պաշտպանության ոլորտում առկա այլ մարտահրավերներին։