Ձեր մեջ Ռոբերտ Քոչարյանի հանդեպ բարդույթ կա․ Լևոն Քոչարյանը՝ Փաշինյանին

Երկրի ղեկավարը նախաքննության փուլում գտնվող կամ դատարանում քննվող գործով խախտում է անմեղության կանխավարկածը և կանխորոշում արդյունքը, ինչով ոտնահարվում են ժողովրդավարությունը, դատական իշխանության անկախությունն ու եվրոպական արժեքները։ Այս մասին Ազգային ժողովում կառավարության հետ հարցուպատասխանի ժամանակ ասել է «Հայաստան» խմբակցության պատգամավոր Լևոն Քոչարյանը՝ անդրադառնալով ԱԺ նիստի ժամանակ Նիկոլ Փաշինյանի հայտարարությանը

«Դուք ասում էիք, թե խուզարկությունների ու կալանքների շրջանակում, ըստ ձեզ, եղել է «խլուրդ», որն ինֆորմացիա է փոխանցել։ Գաղտնիքը բացեմ․ ձեր ասած կոնտեքստում այդ «խլուրդը» դուք եք, որովհետև այդ ինֆորմացիան ստացվել է ձեր հայտարարություններից ու ասածներից։ Սա սարկազմով չեմ ասում, իրականում այդ «խլուրդը» դուք եք։ Հիմա ի՞նչ եք պատրաստվում անել այս բացահայտումից հետո։ Ձեր թիմակիցներից մեկն ասում էր՝ «պետք է ձեռքերը կտրել»․ ինձ թվում է՝ չարժե նման ծայրահեղ քայլերի գնալ, բայց, ամեն դեպքում, ի՞նչ եք անելու»,- ասել է պատգամավորը։

Խոսելով ՀՀ երկրորդ նախագահ Ռոբերտ Քոչարյանի կալանավորման մասին՝ Լևոն Քոչարյանը նշել է, որ Փաշինյանի մեջ Ռոբերտ Քոչարյանի հանդեպ բարդույթ կա։

«Երևի նրանից, որ նա ձեզ պես չի փախել, ինչպես դուք ժամանակին մեկ տարուց ավելի արևին էիք նայում ու պատմում վարագույրի ծակից, իսկ նա, ունենալով բոլոր հնարավորությունները, հետ է եկել։ Երևի այս բարդույթն է ամեն ինչի հիմքում»,- հավելել է նա։