Ռուսաստանի և ԱՄՆ-ի հարաբերությունների բարելավումը դեռ շատ հեռու է․ Իվան Տիմոֆեև

Ռուսաստանի միջազգային գործերի խորհրդի (ՌՄԳԽ) գլխավոր տնօրեն Իվան Տիմոֆեևը Alpha News-ին մեկնաբանել է Ռուսաստանի հարաբերությունները ԱՄՆ-ի և Եվրոպայի հետ։ Նա խոսել է Ռուսաստանի՝ Տնտեսագիտության բարձրագույն դպրոցի Համապարփակ եվրոպական և միջազգային հետազոտությունների կենտրոնի հիմնադրման 20-ամյակին նվիրված «Ռուսաստանը և նոր բազմաբևեռությունը․ գաղափարից դեպի իրականություն» միջազգային գիտագործնական համաժողովի շրջանակում։

«Հարաբերությունների բարելավումից դեռ շատ հեռու ենք, ես կասեի՝ շատ ու շատ հեռու։ Մենք կարող ենք առաջընթաց գրանցել առանձին խնդիրների լուծման հարցում, և նույնիսկ դա դեռ փաստ չէ, որ որևէ արդյունք կունենա, քանի դեռ չենք լուծել գլխավոր հարցը։ Ես առաջին հերթին նկատի ունեմ Ուկրաինայի հակամարտությունը։

Առանց դրա հիմնարար կարգավորման, ինչին ձգտում է ռուսական կողմը, ցավոք, հնարավոր չէ խոսել արևմտյան երկրների, այդ թվում՝ ԱՄՆ-ի հետ հարաբերությունների որևէ կարգավորման մասին», — հայտարարել է Տիմոֆեևը։

ՌՄԳԽ-ի գլխավոր տնօրենը մեկնաբանել է Ռուսաստանի և եվրոպական երկրների միջև ուղիղ ռազմական բախման հնարավորությունը, հատկապես Մոսկվայի՝ ՆԱՏՕ-ի երկրներին ուղղված այն նախազգուշացման ֆոնին, որ Կալինինգրադի մարզի նկատմամբ ագրեսիվ գործողությունների դեպքում հնարավոր են հետևանքներ։

«Այո՛, նման տրամադրություններ կան, և, այսպես ասած, «բազեներ» ամենուրեք կան։ Բայց ինձ թվում է՝ նման բախումից դեռ բավական հեռու ենք, քանի որ կան մի շարք զսպող գործոններ։

Այնուամենայնիվ, Եվրամիությունն ինքնին ռազմական կազմակերպություն չէ։ ԵՄ անդամ երկրների մեծ մասը Հյուսիսատլանտյան դաշինքի անդամներ են, այսինքն՝ այնտեղ կան նաև, օրինակ, ԱՄՆ-ն ու Կանադան։

Հետևաբար, որևէ ռազմական գործողություն՝ հատկապես կոալիցիոն բնույթի, կարող է իրականացվել ՆԱՏՕ-ի, այլ ոչ թե ԵՄ-ի հարթակում։ Այս պահին ԵՄ-ն ռազմական կազմակերպություն չունի։

Կան ԵՄ առանձին երկրներ, որոնք ինքնիշխան պետություններ են և ունեն իրենց զինված ուժերը։ Տեսականորեն նրանք կարող են դրանք օգտագործել իրենց արտաքին քաղաքական խնդիրները լուծելու համար։ Սակայն Ռուսաստանի և ԵՄ-ի միջև ուղիղ բախման սցենարն առայժմ իրավական առումով նույնպես հստակ չէ, քանի որ Եվրամիությունը չունի այնպիսի իրավական մեխանիզմներ, որոնք կսահմանեն նրան որպես ռազմական կազմակերպություն։ Առայժմ ԵՄ երկրները ՆԱՏՕ-ի կազմում են», — ընդգծել է նա։

Պատասխանելով այն հարցին, թե արդյոք Գերմանիայի իշխանությունները կարող են գնալ Ռուսաստանի հետ հարաբերությունների սրման՝ սեփական հասարակության ուշադրությունը ներքաղաքական խնդիրներից շեղելու նպատակով, Իվան Տիմոֆեևը նշել է, որ, ամենայն հավանականությամբ, ամեն ինչ կսահմանափակվի Գերմանիայի իշխանությունների ագրեսիվ հռետորաբանությամբ։

«Սա մեծ ռիսկ է՝ և՛ ներքաղաքական, և՛ արտաքին քաղաքական առումով։ Այնուամենայնիվ, Ռուսաստանը ռազմական առումով բավական հզոր երկիր է, և այստեղ կան տարբեր բնույթի ռիսկեր, որոնց գնալը չափազանց վտանգավոր է։

Ուստի կարծում եմ՝ առայժմ ամեն ինչ կսահմանափակվի հռետորական ձևակերպումներով։
Թեև ԵՄ երկրներում ռազմարդյունաբերական համալիրի արդիականացումը, արդյունաբերությունը ռազմական պահանջներին համապատասխանեցնելու գործընթացը և ռազմական ծախսերի ավելացումը կշարունակվեն տարբեր չափերով՝ կախված տվյալ երկրների ռեսուրսային հնարավորություններից։ Սակայն այս գործընթացն արդեն մեկնարկել է և շարունակվելու է», — հավելել է փորձագետը։