Ամբողջ կյանքը ստեղծագործության մեջ. Յուրի Ասլանյան

Alpha News-ը շարունակում է ներկայացնել «Ալֆա պերսոնա» շարքը:

Այսօր հայտնի լրագրող, գրող Յուրի Ասլանյանի ծննդյան օրն է։ Նա դարձավ 69 տարեկան։

Յուրի Իվանովիչը ծնվել և մեծացել է Պերմի մարզում՝ Կրասնովիշերսկ քաղաքում, և արդեն իր պատանեկության տարիներին սկսել է բանաստեղծություններ և արձակ գրել։ Ասլանյանն ավարտել է Պերմի Գորկու անվան պետական համալսարանի բանասիրական ֆակուլտետը։

90-ականների սկզբին նա թղթակցել է մի շարք թերթերի, այնուհետև դարձել «Պերմի գրախոս» թերթի գլխավոր խմբագիր։ Յուրի Ասլանյանը գրել է սոցիալական սուր հոդվածներ, դիմանկարային ակնարկներ, նաև հետաքննական նյութեր։

1992 թվականից Յուրի Իվանովիչը դարձել է Ռուսաստանի գրողների միության անդամ, իսկ 1996 թվականից՝ Ռուսաստանի լրագրողների միության անդամ: Ասլանյանը Ա. Գայդարի անվան լրագրողական վարպետության մրցույթի, «Սպիտակ արջ» համառուսաստանյան բնապահպանական մրցանակի, Պերմի մարզի վարչակազմի «Էկոլոգիա. Տարվա մարդ» մրցանակների դափնեկիր է։

Նա նաև մի քանի գրքերի հեղինակ է, այդ թվում գրել է «Սիբիրյան վերլիբր» պատմվածքը, «Աստծո տարածքը» և «Աշխարհի առեղծվածային դոմինանտը» վեպերը, «Վերջին փախուստը» պատմվածքների ժողովածուն, «Պեչորայի տրակտը» բանաստեղծական ժողովածուն։

Յուրի Ասլանյանը մասնակցել է նաև քաղաքական բռնաճնշումների զոհերի հիշատակին նվիրված գրքի գրմանը։ Նա ունի 11 գիրք, ինչպես նաև բանաստեղծությունների ժողովածուներ: